Акафисты и молитвы.

Акафист святому Предтече Господню Иоанну

 

Кондак 1

Избрaнный от лет древних быти Предтечею и Крестителем Спасителя мира Христа Бога, Иоанне богохвaльне, прославляюще прослaвльшаго тя Господа, похвaльная восписyем ти, яко бoльшему всех рождeнных женaми, во плoти aнгелу, покаяния проповеднику. Ты же, яко имeяй велие дерзновение ко Господу, от всяких бед свобождай и к покаянию воздвизай нас, любовию тебе зовущих: Радуйся, великий Иоанне, Прорoче, Предтeче и Крестителю Господень.

Икос 1

Архангел Гавриил, предстояй пред Богом послан бысть ко иерею Захарии, егда той служa по чину чреды своея, вниде покадити в церковь Господню, и, представ одеснyю олтаря кадильнаго, благовествовaше о твоем рождестве, великий Иоанне, возвещая Захарии радость и веселие и яко мнози о рождестве твоем возрадуются. Сего ради и мы, дивному о тебе Божию благоволeнию чудящеся и рaдующеся, со благоговeнием в похвалу тебе вопиeм:

Радуйся, Совета Божия неизречeнного таинниче; радуйся, дивнаго смотрeния Его исполнение.

Радуйся, прежде лет многих пророчеством Исаии проявлeнный; радуйся, вeстниче пред лицем Господним, древле проречeнный.

Радуйся, предназнaченный быти великим пророком Вышняго; радуйся, по обетованию Ангела рожденный.

Радуйся, еще во чреве мaтере твоея Духа Святaго испoлненный; радуйся, прежде рождества твоего на великое служение извещeнный.

Радуйся, неплодства родителей разрешeние; радуйся, иерея Божия радость и веселие.

Радуйся, дщeре Аарoновы прозябeние; радуйся, плод молитвы Богодаровaнный.

Радуйся, великий Иоанне, Пророче, Предтече и Крестителю Господень.

Кондак 2

Видя Захария явльшагося ему Ангела, смутися, и страх нападe нань, и не вeрова словесeм благовестия его о рождестве твоем: егдa же за неверие немотoю связан бысть, удивляшеся преславному чудеси, всем сердцем вопия Богу: Аллилyиа.

Икос 2

Разум неуразумевaемый разумeти ищуще людие, ждyще Захарию, чудяхуся, умeдлившу ему в церкви; изшeдшу же ему и не могyщу глаголати к ним, но тoкмо помавaющу, разyмеша вси, яко видeние виде в церкви. Мы же, прославляюще дивнаго Творца чудес, Бога, вопием тебе таковaя:

Радуйся, благий винoвниче безглaсия отча; радуйся, слез мaтере твоея пременeние на радость.

Радуйся, тоя поношeния в людех отъятие; радуйся, великое рoждшим тя утешeние.

Радуйся, яко в шестый месяц о зачатии твоем Пресвятая Дева Мария в Назарeте от Ангела известися; радуйся, яко о рождестве твоем мнози возвеселишася.

Радуйся, яко имя благодатное от Ангела наречeнное, получивый; радуйся, яко именем твоим немотствовaние отца твоего Захарии разрешися.

Радуйся, яко Имя Божие о тебе отцем твоем благословися; радуйся, яко о чуднем рождестве твоем страх и удивление в oкрест живущих явися.

Радуйся, яко по всей стране Иудeйстей о дивнем рождестве твоем возвестися; радуйся, яко тобою спасение многим в мире сем явися.

Радуйся, великий Иоанне, Пророче, Предтече и Крестителю Господень.

Кондак 3

Сила Вышняго разреши неплодство заматорeвшия во днех своих праведныя Елисаветы: зачат бо тя, славный Предтече Господень, и таяшеся месяц пять, глагoлющи: яко тaко мне сотвори Господь во дни, в няже призрe отъяти поношение мое в человeцех. Егда же прия Имyщую во чреве Христа, испoлнися Духа Свята и возопи гласом вeлиим: «Откyду мне сие, яко прииде Мати Господа моего ко мне!» С Нeюже рaдующися, взывaше Богу: Аллилyиа.

Икос 3

Имeяй предъити пред Господем духом и силою Илииною, ещe из чрева мaтере твоея исполнился еси Духа Святаго, отонyдуже и Пророк дивный показался еси, егдa во утробе мaтере твоея сый, взыгрался еси рaдощами пришествию Мaтере Господни. Бога бо познал еси носима в ложеснaх Благодатныя и Того матерним гласом проповедал еси: подобaше бо Божественных вещей преславным быти началом. Сему убо благоговейно удивляющеся, с радостию тебе вопием:

Радуйся, еще во утробе матерней предпославшаго тя Господа чудным веселием предъявивый; радуйся, яко тебe ради и матери твоей Елисавeте воплощeние Христово открыся.

Радуйся, яко и та исполнися Духа Свята; радуйся, яко и она предивная пророчица явися.

Радуйся, яко от нея Пресвятая Дева Мария Блажeнною в женах наречeся; радуйся, яко тою Она и Материю Господа наименовaся.

Радуйся, яко и безсeменный плод Тоя Благословенным пронаречeся; радуйся, Премудросте Божественныя предъявлeние.

Радуйся, святаго супрyжества благословение; радуйся, неплoдных ложeсн дивное прозябение.

Радуйся, рождением твоим удививый люди; радуйся, светлый Слова глaсе.

Радуйся, великий Иоанне, Пророче, Предтече и Крестителю Господень.

Кондак 4

Бурею сомнения смущeнный, иерeй Захария не можaше, по словеси ангельскому, проглагoлати. Егдa же по рождестве твоем, Предтече Господень, написа благодатное имя твое, абие отверзoшася устa и язык его, и глагoлаше, благословя Бога, и пророчества, глаголя: Благословeн Господь Бог Израилев, яко посети и сотвори избавление людем Своим, и ты, отроча, Пророк Вышняго наречeшися, поя Тому: Аллилyиа.

Икос 4

Слышаша oкрест живyщии людие о преслaвном и чудном рождестве твоем, со удивлением глагoлаху в себe: «Что убо отрочa сиe бyдет?» Мы же тя, преславный Предтече Господень, яко бoльша всех рождeнных женaми, достойно чтyще, ублажaем сице:

Радуйся, от зачатия твоего благодатных явлений испoлненный; радуйся, в рождестве твоем Богом прослaвленный.

Радуйся, во младенчестве твоем от отца твоего Пророком Вышняго наречeнный; радуйся, во отрочестве твоем Духом Святым просвещeнный и укреплeнный.

Радуйся, Бога воплотившагося сродник по плoти бывый; радуйся, от Бога высокое звание Предтечи и Крестителя приeмый.

Радуйся, зарe, свет новый миру возвестившая; радуйся, звездo, путь, ведущий ко Христу, осветившая.

Радуйся, деннице Сoлнца незаходимаго; радуйся, светильниче Света неугасaемаго.

Радуйся, путь грядyщему Христу уготовляяй; радуйся, ангела и человека в себе являяй.

Радуйся, великий Иоанне, Пророче, Предтече и Крестителю Господень.

Кондак 5

Богопротивное веление беззакoннаго детоубийцы Ирода изгнa тя из дoму oтча в непрохoдную пустыню, носима мaтерию, Предтече Господень, идeже и пребывaл еси до дне явления твоего ко Изрaилю, ядый акриды и мед дивий и Богу вопия: Аллилyиа.

Икос 5

Видяще дивное Божие о тебе промышление, Иоанне богохвaльне, яко от младeнческих пелeн постническаго жития любитель показался еси, отонюдуже волею Вышняго пoслан был еси проповедати людем грядущее во Христе спасение. Сего ради со удивлением и любовию тебе взываем:

Радуйся, яко, еще младенец сый, царя Ирода устрашил еси; радуйся, от напраснаго убиeния тем десницею Вышняго сохранeнный.

Радуйся, пустыни шипoк благовoнный; радуйся, высотою подвигов твоих всех удививый.

Радуйся, прaваго пути верный указaтелю; радуйся, чистоты и целомудрия предивный хранителю.

Радуйся, евангельскаго самоотвержения образе совершенный; радуйся, монашествующих покрoве и утверждение.

Радуйся, богослoвствующих умов просвещение; радуйся, грешным милосердия Божия двери отверзaяй.

Радуйся, кающимся грешником от Господа прощение подавaяй; радуйся, плоды достойны покаяния творити помогaяй.

Радуйся, великий Иоанне, Пророче, Предтече и Крестителю Господень.

Кондак 6

Проповедник славный ты, божественный Предтече, показался еси в пустыни Иорданстей во дни явления Христа Бога миру. Сего бо, Грядущаго к тебе, показал еси людем, глаголя: се, Агнец Божий, вземляй грехи мира; Егоже мы верою познавше, поем Ему: Аллилyиа.

Икос 6

Возсиял еси свет истины, Иоанне богопросвещeнне, всем являяй Славы Отчия сияние, явльшееся плoтски нас ради. Вопиял бо еси в пустыни людем: «Покайтеся, приближи бо ся Царствие Небесное: сотворите плоды достойны покаяния. Се бо грядет по мне, Иже крестит вы водою и Духом». Сего ради похвальная тебе вопием:

Радуйся, пришествия Мессии возвестителю; радуйся, путей Господних уготoвателю.

Радуйся, ветхия и новыя благодати ходaтаю; радуйся, пророков предeле и начало апостолов.

Радуйся, глaсе Слова благознаменитый; радуйся, покаяния проповедниче велеглaсный.

Радуйся, многих сынов Израилевых ко Господу обративый; радуйся, люди совершенны Господеви уготoвавый.

Радуйся, фарисеев и саддукеев дерзновенно обличивый; радуйся, плоды достойны покаяния творити научивый.

Радуйся, просвещения духовнаго указателю; радуйся, ищущим предстательства твоего неусыпный заступниче.

Радуйся, великий Иоанне, Пророче, Предтече и Крестителю Господень.

Кондак 7

Хотящу от тебе креститися Господу Иисусу, Иоанне богоблажeнне, глагoлал еси: «Аз требую Тобою креститися», обaче повинуяся, рeкшу Тому: «Остави ныне», воздвигл еси десницу твою на главу Его и, крестив не требующаго очищения, вопиял еси: Аллилyиа.

Икос 7

Новую подая благодать креститися извoливый от тебе Господь, сподoби тя Духа пришествие видети и глас Отеческий с Небесe, свидетельствующий Его Сыновствo, слышати. Отонюдуже в Триeх Лицех Единому Богу покланятися нас научил еси, Егоже брeнными прославляюще устнaми, в похвалу сия тебе приносим:

Радуйся, Троическаго Богоявления первый проповедниче; радуйся, в Триeх Лицех Единаго Бога истинный поклoнниче.

Радуйся, Духа Святаго в виде голубине яснозрителю; радуйся, снисхождения Его от Отца на Сына свидeтелю.

Радуйся, гласа с Небесе от Бога Отца слышателю; радуйся, явления любве Отчи к Сыну созерцaтелю.

Радуйся, Сына Божия избрaнный Крестителю; радуйся, воли Его святыя исполнителю.

Радуйся, славнаго служения спасению рода человеческого ревностный рачителю; радуйся, великаго Таинства Крещения первый совершителю.

Радуйся, Божественныя радосте вестниче; радуйся, Новаго Завета первый учителю.

Радуйся, великий Иоанне, Пророче, Предтече и Крестителю Господень.

Кондак 8

Странное и неизречeнное смирение воплотившагося Бога Слова видев, богоблажeнне Крестителю, Божественную Свою главу приклонивша и рабское крещение приeмша, ты и сам весь исполнился еси великаго смирения. Испроси убо боголюбeзную добродетель сию и нам, одержимым гордостию, яко да от сердца смирeнна вопиeм ему: Аллилyиа.

Икос 8

Весь благодaтных даровaний испoлненный, течение времeнныя жизни скончавaя, Иоанне богознамените, всех поучал еси исполнением Закона и покаянием благоугождaти Господеви. Сего ради благодарственное хваление тебе, великому учителю истины, воспеваем:

Радуйся, Закона и оправданий Господних насадителю; радуйся, Иродова беззакония обличителю.

Радуйся, о исправлении того рачителю; радуйся, правды ради темничное заключение и узы претерпeвый.

Радуйся, за истину во главу усечeнный; радуйся, яко тело твое от учеников твоих чeстне погребeся.

Радуйся, яко Божиим смотрением глава твоя нетленна соблюдeся; радуйся, яко та на утешение, освящение и цельбы христиaном дадeся.

Радуйся, яко и деснице твоей, крестившей Господа, вернии благочестне покланяются; радуйся, яко от тебe мнoгая чудеса теми доныне совершаются.

Радуйся, яко тобою вернии от страстей безчестия избавляются; радуйся, яко тобою грешнии к покаянию воздвизаются.

Радуйся, великий Иоанне, Пророче, Предтече и Крестителю Господень.

Кондак 9

Все естество ангельское удивися высоте служения твоего, и Церковь благоговейно прославляет тя, яко друга Христа Бога, предшедшаго пред Ним духом и силою Илииною. Ревнуя бо по истине, дерзновенно обличал еси фарисеев и беззаконнаго Ирода, от него же и мученическую кончину приял еси. Покланяющеся убо честнeй главе твоей, молимся ти: избави нас от страстей безчестия, да чистым сердцем и усты поeм: Аллилyиа.

Икос 9

Ветийство всякое земнородных не довлеет достойно восхвалити тя, Иоанне богохвальне: тебе бо уста Христова похвалиша, высша пророков и больша всех рождeнных женaми тя наименоваша. Отнюдуже достойную похвалу принести тебе недоумевaюще, вопиeм ти сицевая:

Радуйся, Церкве Христовы великая слaво; радуйся, Ангелов предивное чудо.

Радуйся, прaотцев радость и прославление; радуйся, пророков высокая похвало.

Радуйся, апостолов богосветлый вeнче; радуйся, святителей велелeпая красотo.

Радуйся, мучеников в новой благодати начало; радуйся, преподобных совершение.

Радуйся, праведных удобрение; радуйся, девственников и пoстников основание.

Радуйся, всех христиан великое утешение; радуйся, яко от всех христианских родoв имя твое прославляется.

Радуйся, великий Иоанне, Пророче, Предтече и Крестителю Господень.

Кондак 10

Спасти мир Пришедшаго во плoти Христа Бога благовестил еси и сущим во аде, якоже бо денница, предходящая солнцу, осветил еси во тьме и сени смeртней седящих. Отонюдуже вскоре Господем изведeн был еси со всеми от века праведными, поя Ему, яко Избaвителю и Победителю смерти: Аллилyиа.

Икос 10

Стена еси и прибежище спасительное всем, молитвенно к тебе притекающим, божественный Иоанне. Сего ради песньми похвальными ублажаем тя сице:

Радуйся, мощный заступниче наш и верный от бед хранителю; радуйся, злостраждущих от духов злобы скорый помощниче и избaвителю.

Радуйся, неплодствующим благословение от Бога низпосылaяй; радуйся, притекающих к тебе с верою от треволнeния страстей избавляяй.

Радуйся, во вражде сущих скоро умиротворяяй; радуйся, во всякой нyжде и печали усердно притекающим к тебе скорую помощь подавaяй.

Радуйся, благотекущих от самообольщения и прелести изымaяй; радуйся, вручающим себе твоему ходaтайству в час смертный помогaяй.

Радуйся, любящих тя от воздушных мытарств предстательством твоим свобождaяй; радуйся, почитающих славную память твою вечныя жизни молитвами твоими сподобляяй.

Радуйся, нищих и вдовиц и сирот заступление; радуйся, по Бoзе и Богородице христиaном прибежище и упование.

Радуйся, великий Иоанне, Пророче, Предтече и Крестителю Господень.

Кондак 11

Пение всякое не довлeет по достоянию доблестей твоих восхвалити тя, Крестителю Господень. Но мы, любовию понуждeни, дерзаем воспевати величия твоя, еже милостивно приими от нас, первостоятелю у Престола Пресвятыя Троицы, и моли свободитися нам от всякия скверны греховныя, да чистым сердцем и устнами поeм Богу: Аллилyиа.

Икос 11

Светильника Света неприступнаго и всесветлых благодатных дарований всего исполнена тя, Иоанне богопросвещенне, вeдуще, радостно приносим ти таковая:

Радуйся, самовидче озарившаго тя свыше Божественнаго Света; радуйся, светом добродетелей твоих прославивый Бога.

Радуйся, Пресвятыя Троицы велелeпую славу явивый; радуйся, правый и дивный путь к Небеси показaвый.

Радуйся, и сущим во aде Бога, явльшагося во плoти, благовестителю; радуйся, душ праведных, от века в преисподней держимых, возвеселителю.

Радуйся, Владыки Христа Бога друже искренний; радуйся, явивый миру Свет истинный.

Радуйся, светозaрное света евангельского сияние; радуйся, рода христианскаго прославление.

Радуйся, Совета Божия исполнение; радуйся, яко от восток солнца даже до запад хвально имя твое.

Радуйся, великий Иоанне, Пророче, Предтече и Крестителю Господень.

Кондак 12

Благодати тезоименитый Крестителю Господень и тoю обогатився, победоносец преславный показался еси: победил бо еси враги и всякую злобу и великое служение твое мученическим подвигом запечатлел еси. Ныне же, предстоя Престолу Царя царствующих, моли его даровати верным победы на враги и во всем благопоспешение, в добродeтелех же благодатное укрепление, поющим ему: Аллилyиа.

Икос 12

Поюще Бога, дивно в тебе прослaвльшагося, хвaлим тя, богоблаженне Крестителю, яко искренняго друга Христова, прославляем великия подвиги твоя, ублажаем мученическую кончину твою и сицевaя радостно вопиeм ти:

Радуйся, вселенский апостоле и Новаго Завета первомyчениче; радуйся, явлением Христа на земли открывшагося Царствия Небеснаго первый проповeдниче.

Радуйся, языков Божественное призвание предвозвестивый; радуйся, безвестная и тайная премудрости Божия миру явивый.

Радуйся, божественными деянии плодоносен паче иных явивыйся; радуйся, яко светом дел твоих прославися Отец Небесный.

Радуйся, яко о памяти твоей Церковь Христову веселиши неизреченно; радуйся, яко ныне вечнаго наслаждаешися веселия изобильно.

Радуйся, божественными лучами Трисолнечнаго Света осиявaемый; радуйся, яко со безплотными Трисвятую песнь Богу немолчно вопиеши.

Радуйся, яко ныне, зерцалом разрeшшимся,/несрeдственне зриши СвятуюТроицу.

Радуйся, великий Иоанне, Пророче, Предтече и Крестителю Господень.

Кондак 13

О великий и преславный Предтече и Крестителю Господень Иоанне, приими от нас ныне приносимое тебе моление и твоими богоприятными к Богу молитвами избави нас от всякаго зла, и вечныя изми муки, и наследниками Царствия Небеснаго содeлай, да во веки поем Богу: Аллилyиа.

(Этот кондак читается трижды, затем икос 1 и кондак 1)

МОЛИТВА СВЯТОМУ ИОАННУ ПРЕДТЕЧЕ

Крестителю Христов, проповедниче покаяния, кающагося не презри мене, но совокупляяся с вoи Небесными, молися ко Владыце за менe, недостойнаго, унылаго, немощнaго и печальнаго, во многия беды впaдшаго, утруждeннаго бурными пoмыслы ума моего. Аз бо есмь вертеп злых дел, отнюдь не имeяй конца греховному обычаю, пригвождeн бо есть ум мой земным вещeм. Что сотворю? Не вем. И к кому прибегну, да спасeна будет душа моя? Токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ибо ты сподобился еси коснутися верхy Царя Христа, взeмлющаго грехи мира, Агнца Божия. Егoже моли за грешную мою душу, да понe отныне, в первыйнaдесять час, понесу тяготу благую и приму мзду с последними. Ей, Крестителю Христов, честный Предтече, крайний Пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя, падшагося многими грехи. Обнови душу мою покаянием, яко вторым крещением, понeже обоегo начальник еси: крещением омывaяй прародительный грех, покаянием же очищaяй коегождо дело скверно. Очисти мя, грехами осквернeннаго, и понyди внити, aможе ничтоже скверно входит, в Царствие Небесное.

Аминь.

 

АКАФИСТ ПРЕСВЯТОЙ ТРОИЦЕ

 

Кондак 1

Предвечный Царю веков и Господи, всея твари видимыя и невидимыя Содетелю,/ Емуже, в Троице Святей славимому Богу,/ всяко колено покланяется Небесных, земных и преисподних: / темже и мы, яко крещеннии в Трисвятое Имя Твое,/ аще и недостойнии, хвалебное сие дерзаем принести Тебе пение:/ Ты же, яко Творец, Промыслитель и Судия наш,/ вонми гласу раб Твоих, и не отстави милости Твоея от нас,/ да из глубины души выну зовем Ти:/ Свят, Свят, Свят еси Господи Боже наш,/ помилуй ны, падшее создание Твое, Имене ради Святаго Твоего.

Икос 1

Архангели и Ангели, Начала и Власти, Престоли и Господьствия, предстояще самому Престолу Славы Твоея, не довлеют изрещи величия совершенств Твоих: многоочитии же Херувими и шестокрилатии Серафими, закрывающе лица своя, точию с трепетом и любовию взывают друг ко другу: Свят, Свят, Свят Господь Саваоф: нам убо, иже прах и пепел есмы, кольми паче удобее любити молчание: но, да не толиких щедрот, в создании и искуплении на нас излиянных, непамятливи явимся и неблагодарнии, подражающе горнему славословию, с верою и любовию взываем:

Свят, Свят, Свят еси Господи Боже наш/ неисповедимая совершенств Высото и неизследимая таин Пучино;

Свят еси Господи Боже наш,/ везде сый и вся исполняяй, Единый и Тойжде вчера, днесь и во веки.

Свят еси Господи Боже наш,/ вся могий, нарицаяй не сущая яко сущая, низводяй даже до ада и паки возводяй;

Свят еси Господи Боже наш,/ испытуяй сердца и утробы человеческия, исчитаяй звезды и всем им имена нарицаяй.

Свят еси Господи Боже наш,/ Егоже вси путие истинны и все судьбы оправданы вкупе и вожделенны;

Свят еси Господи Боже наш./ отдая грехи отцев на чада, милуяй же и награждаяй в роды родов.

Свят, Свят, Свят еси Господи Боже наш,/ помилуй ны, падшее создание Твое, Имене ради Святаго Твоего.

Кондак 2

Видев Тя Исаиа на Престоле высоце и превознесение, глаголаше: “О окаянный аз, яко человек сый и нечисты устне имый, и Господа Саваофа видех очима моима”. Егда же угль горящий, носимый от Ангела, прикоснуся устом его, чисте восхваляше Тебе Отца, и Сына, и Святаго Духа, Единаго Бога. Попали убо, о Пресвятая Троице, огнем Божества Твоего терние и наших многих беззаконий, да чистым сердцем возопием Тебе: Аллилуйя.

Икос 2

Разум неуразуменный разумети ищя великий во пророцех Моисей, глаголаше: “Яви мне лице Твое, да разумно вижду Тя”. Ты же к нему: “Задняя Моя узриши, лице же Мое не явится Тебе: не бо узрит человек лице Мое и жив будет”. Нам же, аще и недостойным, благоволил еси явити Себе в лице Единороднаго Сына Твоего: темже благодарне вопием:

Свят, Свят, Свят еси Господи Боже наш, Серафимов пламенногорящая Любы и Херувимов выну светящая Премудросте;

Свят еси Господи Боже наш, Небесных Престолов превышний Царю и премирных Господьствий всеистинный Господи.

Свят еси Господи Боже наш, Вышних Сил непобедимая Крепосте и Горних Властей Всемогущий Властителю:

Свят еси Господи Боже наш, Архангелов всерадостное благовестие и Ангелов неумолкающая проповедь.

Свят еси Господи Боже наш, разумных Начал верховное Всеначало, и всех прочих Небесных чинов державный Повелителю;

Свят еси Господи Боже наш, Един имеяй безсмертие и живый во Свете Неприступнем, со избранными же Твоими, яко со други, лицем к лицу беседуяй.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 3

Силою неизреченнаго могущества Твоего вся содержиши, Словом неизследимыя Премудрости Твоея вся строиши, Духом уст Твоих вся живиши и радуеши, о Трисолнечне Вседетелю Измерил еси небо дланию и землю пядию, носиши и питаеши всю тварь, вся по имени призываеши, и несть могий утаитися властительныя десницы и взора Твоего: сего ради со всеми вышними и нижними силами, со умилением припадающе, зовем Ти: Аллилуйя.

Икос 3

Имеяй всякое создание работно повелению Твоему, всюду являеши следы Промысла и неизчетных совершенств Твоих темже невидимая Твоя и присносущную силу и Божество твореньми помышляема, видяще, со удивлением и радостию зовем:

Свят, Свят, Свят еси Господи Боже наш, властительный Содетелю видимых и невидимых, и любвеобильный Строителю настоящих и грядущих;

Свят еси Господи Боже наш, от четырех стихий составивый тварь и четырьми времены круг лета венчавый.

Свят еси Господи Боже наш, повелевый солнцу светити во дни и луне со звездами просвещати нощь;

Свят еси Господи Боже наш, изводяй ветры от сокровищ, одеваяй небо облаки и посылаяй дождь и росу в прохлаждение зноя.

Свят ecи Господи Боже наш, препоясуяй холмы радостию и долы веселием, украшаяй крины сельныя и венчаяй поля класами;

Свят ecи Господи Боже наш, посылаяй пищу птенцем врановым, напаяяй вся звери сельныя, и полагаяй щедроты Своя на всех делех Своих.

Свят, Свят, Свят еси Господи Боже наш, помилуй ны падшее создание Твое, Имене ради Святаго Твоего.

Кондак 4

Бурю внутрь имея душепагубныя ереси, вторый Иуда, Арий безумный, отвержеся Тебе, Сына Божия, Единаго от Пребожественныя Троицы быти; мы же, аще и ино лице Отчее, ино Сыновне, ино Святаго Духа, глаголем: но Отчее, Сыновнее è Святаго Духа Едино Божество, равну силу, соприсносущно величество сердцем и устны исповедуем и, яко трисолнечным светом в купели Крещения озареннии, Отцу, и Сыну, и Святому Духу, Единому Богу покланяемся, зовуще: Аллилуйя.

Икос 4

Слышавше пастырие и учителие Святыя Церкве Ариа, яко лютаго зверя, вторгшася в словесное Христово стадо и восхищающа овцы от истиннаго исповедания православныя веры, сошедшеся в Никеи на Соборе, Бога, а не тварь, Христа исповедаша, и равна Отцу Сына и Святаго Духа чтуще, громогласне возгласиша:

Свят, Свят, Свят еси Господи Боже наш, Боже Отче, Боже Сыне, Боже Душе Святый, Единый Истинный Боже, а не три бози;

Свят еси Господи Боже наш, несозданный Отче, несозданный Сыне, несозданный Душе Святый, Едине вкупе несозданне, а не три особь несозданны.

Свят еси Господи Боже наш, Отец раждаяй предвечно Сына, Сын раждаемый безлетно от Отца, Дух Святый, из Негоже от век происходяй, но не раждаяся;

Свят еси Господи Боже наш, Отец, воззвавый нас от небытия, Сын, искупивый нас, падших, Крестом Своим, Дух Святый, освящаяй и животворяй всех Своею благодатию.

Свят еси Господи Боже наш, в духе, душе и теле нашем трехчастную скинию на вселение Свое основати благоволивый и всеконечне грехом разрушитися ей в нас не попустивый;

Свят еси Господи Боже наш, знамение Триипостаснаго Существа Своего на всех делех рук Своих, в мире видимем и невидимем, положивый.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 5

Пребезначальная и Вседетельная Троице, создав нас по образу и по подобию Твоему, заповедала еси творити угодная пред Тобою, мы же, окаяннии, злую волю нашу возлюбивше, обеты Крещения отвергохом, образ Твой помрачихом; ныне же паки к Тебе прибегаем и молимся: “Подаждь нам благодать Твою, исхити нас из руки враг видимых и невидимых и спаси ны, имиже веси судьбами, да во веки веков зовем Тебе: Аллилуйя”.

Икос 5

Видя разум превосходящая совершенства Твоя и неизреченная благодеяния к бедным сынам Адамлим (в Тя бо, Триединаго Бога, истинно веруяй, мертвый духом оживляется, оскверненный совестию очищается, погибший спасается), благодарным умом, благодарным сердцем, благодарными усты, от Тебе созданными, преклоньше колена, глаголем:

Свят, Свят, Свят еси Господи Боже наш, в Триипостаснем Совете Твоем положивый сотворити человека и в тело его, от персти взятое, дыхание жизней из уст Твоих вдохнувый;

Свят еси Господи Боже наш, образом и подобием Твоим в лице Адама всех нас почтый и рая сладости наследники учинивый.

Свят еси Господи Боже наш, разумом превыше всего видимаго вознесый нас и тварь всю дольнюю под нозе наши покоривый.

Свят еси Господи Боже наш, древо жизни в пищу нам даровавый и даром безсмертия ны обогативый.

Свят еси Господи Боже наш, преслушавших заповедь прародителей наших и по грехопадении не оставивый, но на уповании спасения прямо Едема вселивый;

Свят еси Господи Боже наш, изведый и нас из чрева матере нашея и благодатию Евангелия, по рождении, освятивый.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 6

Проповедник правды и ревнитель Святаго Имене Твоего, Илия досточудный, воззван от Ангела, ста в горе Хориве: бысть же дух крепок, низлагаяй горы, бысть трус велий и огнь палящ, но не в сих Тя виде, и по огни глас хлада тонка, и тамо Господь; покрыв убо лице милотию, с веселием и страхом взываше: Аллилуйя.

Икос 6

Возсиял еси в просвещение всему миру, сияние трисветлаго Божества Твоего, отгнал еси вся идольская заблуждения, Триипостасный Боже и Господи; весь же род человеческий от долгия тьмы язычества в чудный свет Евангелия привел еси , имже озареннии, славим вседержавный Промысл Твой о нас, зовуще:

Свят, Свят, Свят еси Господи Боже наш, до конца растленную грехом тварь водами потопными потребивый и в лице Ноа обновивый весь род человечь;

Свят еси Господи Боже наш, отлучивый отца верующих Авраама от смешения язык и в потомстве его истинную Церковь основавый.

Свят еси Господи Боже наш, изведый люди Своя из Египта, препитавый их манною в пустыне и введый в землю, кипящую медом и млеком;

Свят еси Господи Боже наш, воздвигий Давида, исполнивый Духом Своим пророки и теми среди Израиля веру в Обетованнаго Искупителя сохранивый.

Свят еси Господи Боже наш, пленом вавилонским согрешшия люди Своя наказавый и по скончании его паки Иерусалиму возградитися повелевый;

Свят еси Господи Боже наш, Маккавеи в вере и преданиих отеческих непоколебимыми до смерти показавый, и Церковь подзаконную, яко невесту, до пришествия возлюбленнаго Жениха, целу соблюдый.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 7

Хотя проявити величие любве и милосердия Твоего к падшему роду человеческому, егда прииде кончина лета, послал еси Единороднаго Сына Твоего раждаема от Жены, бываема под законом, да подзаконныя искупит, Иже, пожив на земли яко человек и искупив ны Крестом Своим, вознесеся на Небо, отнюдуже, исполняяй обетование, низпосла нам Пресвятаго Духа Своего, да зовем вси: Аллилуйя.

Икос 7

Дивное воистинну и новое показал еси чудо, дивный в высоких, Господи, егда, по низпослании Пресвятаго Духа на избранныя ученики и апостолы, извел еси их на проповедь всему миру, да возвестят великое Имя Пресвятыя Троицы и пленят вся языки в послушание веры: темже, чудящеся силе и действию богодухновенных словес их, с радостию зовем:

Свят, Свят, Свят еси Господи Боже наш, избравый немощная, худородная и буия мира, да посрамят крепкия, славныя и премудрыя;

Свят еси Господи Боже наш, воодушевивый безчисленныя сонмы мучеников, да тьмами мучений и смертей запечатлеют истину Евангелиа и силу благодати Христовой.

Свят еси Господи Боже наш, сердце равноапостольнаго Константина знамением Креста преклонивый и тем конец лютым гонением на христиан положивый;

Свят еси Господи Боже наш седмию Вселенскими Соборы богоносных отец, яко седмию столпы, Церковь оградивый и еретическим треволнением неприступну сотворивый.

Свят еси Господи Боже наш, богомудрым учителем и великим подвижником благочестия, яко пресветлым звездам на тверди Церкве, возсияти даровавый;

Свят еси Господи Боже наш, и владыку земли Российския Владимира, к свету истинныя веры наставивый и тем всю страну нашу от прелести многобожия свободивый.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 8

Странно и чудно у дуба Мамврийска узрев Тя Авраам во образе Триех Мужей, аки к единому беседоваше, глаголя: “Господи, аще обретох благодать пред Тобою, не мини раба Твоего”. Трием убо, в Триех явльшихся ему Лицах, Отцу, и Сыну, и Святому Духу, Единому же в существе Богу, до земли поклонися зовый: Аллилуйя.

Икос 8

Весь еси везде и всегда, не точию могуществом неизчетныя силы Твоея, но и богатством вседетельнаго промышления Твоего о всяцем создании Твоем: нам же, якоже рече Сын Твой, и власи главнии вси изочтени суть у Тебе, да ни един от них падет без воли Твоея, темже, уповающе на Промысл Твой, со дерзновением и любовию зовем:

Свят, Свят, Свят еси Господи Боже наш, благоволивый всему роду человеческому разделитися на племена и языки, и коемуждо их место и время жительства указавый;

Свят еси Господи Боже наш, Имже сильнии пишут правду, соблюдаяй избранных Своих, яко зеницу ока.

Свят еси Господи Боже наш, от Негоже исходит всяка премудрость и разум, всяка крепость и сила, всяко здравие и лепота;

Свят еси Господи Боже наш, наводяй и отъемляй брани, венчаяй победою правое оружие, неправое же, посреде самых побед, предопределяяй к сокрушению.

Свят еси Господи Боже наш, даяй знамения на Небеси и на земли, посылаяй огнь, язву и глад на люди, да не до конца заблудят от путей Твоих;

Свят еси Господи Боже наш, возносяй смиренныя от земли, еже посадити со князи людей Своих, и низлагаяй гордыя, яко не обрестися месту их.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 9

Всякое естество, горе и низу, непрестанно славит Тя, предвечнаго Творца и Бога: на небеси едини “Свят, Свят, Свят”, — день и нощь взывают, друзии же венцы своя к подножию ног Твоих полагают: на земли со всею тварию мы, яко украшеннии образом присносущныя Твоея славы, к Тебе молимся и от Тебе великия и богатыя милости чаем, зовуще: Аллилуйя.

Икос 9

Ветия многовещанныя, аще и много труждаются мыслию во испытании о таинстве Пресвятыя Троицы, но не могут разумети, како естеством Един есть Бог, в Триех же совершенных Лицех: мы же веруем точию сему и исповедуем, какоже, не испытуем, и неизчетная благодеяния к нам коегождо из Триех Божественных Лиц добре ведуще, с верою и благодарением зовем:

Свят, Свят, Свят еси Господи Боже наш, праведным судом Твоим всем нам в землю, от неяже взяты есмы, возвратитися и паки, в день воскресения, из нея востати положивый;

Свят еси Господи Боже наш, солнцу, луне и звездам некогда померкнути, земле и всему, еже на ней, огнем преобразитися предопределивый, да вместо их явится Небо ново и земля нова, в нихже правда живет.

Свят еси Господи Боже наш, уставивый день, воньже предстанут на суд вся племена и языцы, да восприимет кийждо по делом своим;

Свят еси Господи Боже наш, имеяй в день воздаяния рещи праведным: “Приидите, благословеннии Отца Моего, и наследуйте Царствие, уготованное вам от сложения мира”.

Свят еси Господи Боже наш, от Негоже нераскаяннии грешницы услышат тогда со страхом: “Отъидите от Мене, проклятии, во огнь вечный, уготованный диаволу и ангелом его”.

Свят еси Господи Боже наш, обещавый Церковь Свою до конца мира непоколебиму соблюсти, во еже неодоленней быти ей и от врат адовых.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 10

Спасти хотя мир, явилася еси на Иорданстей реце Пресвятая и Пребожественная Троице: Отец во гласе с Неба, свидетельствуяй о возлюбленнем Сыне, Сын, во образе человечестем, приемляй Крещение от раба, Дух Святый, сходяй на Крещаемаго в виде голубине, темже во Имя Единаго Бога, в Три же Лица — Отца, Сына и Святаго Духа, научихомся просвещати Крещением всякаго грядущаго в мир человека, зовуще: Аллилуйя.

Икос 10

Царю Превечный, сияяй солнце Свое на благия и злыя, праведныя любяй, грешныя же милуяй, скверну душевную и телесную нашу омый, обитель Свою в нас, аще и недостойных рабех Твоих, сотворити благоволи, потреби нечистая наша помышления, изглади неподобная деяния, направи язык глаголати благоугодная пред Тобою, да чистым сердцем и устны со умилением зовем:

Свят, Свят, Свят еси Господи Боже наш, о Немже апостольский лик яве глаголет, к Немуже пророческий собор выну взирает;

Свят еси Господи Боже наш, Егоже полк мученический боголепно исповедует, и преподобных воинство Пресвятое Имя славословит.

Свят еси Господи Боже наш, о Немже пустынников множество присно воздыхает, от Негоже постников подвиги венчаются;

Свят еси Господи Боже наш, Емуже святители и пастыри благодарственное приносят пение, Имже вселенстии учители во спасение наше богомудрствуют.

Свят еси Господи Боже наш, приими мольбу о нас и предстательство всех святых, паче же простирающую к Тебе о нас руце Своя Деву Пречистую;

Свят еси Господи Боже наш, огради нас Святыми Твоими Ангелы и отжени от нас духов злобы поднебесных.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 11

Пение всякое изнемогает, тщащееся принести должное благодарение Тебе, о всех и за вся, в Троице славимому Богу: не обретается бо ни разума, могуща сраспростретися мыслию ко множеству щедрот Твоих на нас, ни слова, во еже достойне изрещи я: обаче за вся, нами видимая и нам подаемая, буди Тебе, Пресвятая Троице, благодарение от нас, честь и слава, яковы же Ты Сама Твоего величества достойны и Тебе угодны веси: мы же, покланяющеся Тебе, со смирением и любовию зовем: Аллилуйя.

Икос 11

Яко светоподательна Тя во обетованиих Твоих светильника, сущим нам во тьме неведения о будущем жребии нашем явльшася, благодарне исповедующе, и поне единаго из блаженств, Единородным Сыном Твоим возвещенных, улучити желающе, всеумильно с верою вопием:

Свят, Свят, Свят еси Господи Боже наш, уготовавый избранным Своим блага, ихже око не виде, ухо не слыша и яже на сердце человеку не взыдоша;

Свят еси Господи Боже наш, Егоже вси чистии сердцем узрят, якоже есть, и познают, якожее от Него сами познани суть.

Свят еси Господи Боже наш, в Немже вси алчущии и жаждущии правды обретут, николиже оскудевающее насыщение;

Свят еси Господи Боже наш, or Негоже миротворцы, яко подражатели вся умиротворившаго Единороднаго Сына Твоего, возлюбленными сынами нарекутся.

Свят еси Господи Боже наш, у Негоже кротцыи наследят землю и нищии духом улучат некончаемое Царствие;

Свят еси Господи Боже наш, обещавый вечное помилование милующим и безконечное радование плачущим.

Свят, Свят. Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 12

Благодать Твою всесильную подаждь нам, Пресвятая Троице: приими исповедание грехов наших пред величеством славы Твоея, призри на воздыхания наша, низпосли нам духа умиления и щедрот, да, очищеннии душею и сердцем, сподобимся неосужденно звати к Тебе на земли, якоже взывают Ангели на Небеси: Аллилуйя.

Икос 12

Поюще Твое всечеловеколюбное смотрение, славим Тя вси, Пребезначальная Троице, веруем во Единаго Бога Отца, Бога Сына и Бога Духа Святаго, иного, разве Тебе. Господа не вемы, к Тебе припадаем и Тебе молимся вопиюще:

Свят, Свят. Свят еси Господи Боже наш, буди нам во спасение, да не убоимся никоегоже зла, и в защищение живота нашего, да не устрашимся никоегоже врага;

Свят еси Господи Боже наш, грешныя кающияся спасаяй, спаси убо и нас, многогрешных.

Свят еси Господи Боже наш, умножаяй всем милость Твою, умножи ю и на нас и помилуй ны, яко немощни есмы;

Свят еси Господи Боже наш, продолжи нам век к покаянию и не осуди нас на посечение с смоковницею безплодною.

Свят еси Господи Боже наш, избави ны искушений, от мира, плоти и диавола находящих, и укрепи в вере и любви к Тебе;

Свят еси, Господи Боже наш, сподоби ны лицем к лицу узрети Тя и внити в светлый чертог Твой на брак Агнчий.

Свят, Свят, Свят еси Господи Боже наш, помилуй ны, падшее создание Твое, Имене ради Святаго Твоего.

Кондак 13

О Пресвятая, Животворящая, Неразделимая и Вседетельная Троице, Отче, Сыне и Душе Святый, Едине истинный Боже и Творче наш! Нынешнее наше приемши благодарение, низпосли нам благодать и силу от высоты Святаго Престола Твоего, да, поправше вся плотския похоти, во всяком благочестии и чистоте поживем до конца дней наших, выну восхваляюще Пресвятое Имя Твое и зовуще: Аллилуйя.

сей кондак глаголи трижды, по нем же паки:

Икос 1

Архангели и Ангели, Начала и Власти, Престоли и Господьствия, предстояще самому Престолу Славы Твоея, не довлеют изрещи величия совершенств Твоих: многоочитии же Херувими и шестокрилатии Серафими, закрывающе лица своя, точию с трепетом и любовию взывают друг ко другу: Свят, Свят, Свят Господь Саваоф: нам убо, иже прах и пепел есмы, кольми паче удобее любити молчание: но, да не толиких щедрот, в создании и искуплении на нас излиянных, непамятливи явимся и неблагодарнии, подражающе горнему славословию, с верою и любовию взываем:

Свят, Свят, Свят еси Господи Боже наш/ неисповедимая совершенств Высото и неизследимая таин Пучино;

Свят еси Господи Боже наш,/ везде сый и вся исполняяй, Единый и Тойжде вчера, днесь и во веки.

Свят еси Господи Боже наш,/ вся могий, нарицаяй не сущая яко сущая, низводяй даже до ада и паки возводяй;

Свят еси Господи Боже наш,/ испытуяй сердца и утробы человеческия, исчитаяй звезды и всем им имена нарицаяй.

Свят еси Господи Боже наш,/ Егоже вси путие истинны и все судьбы оправданы вкупе и вожделенны;

Свят еси Господи Боже наш./ отдая грехи отцев на чада, милуяй же и награждаяй в роды родов.

Свят, Свят, Свят еси Господи Боже наш,/ помилуй ны, падшее создание Твое, Имене ради Святаго Твоего.

Кондак 1

Предвечный Царю веков и Господи, всея твари видимыя и невидимыя Содетелю,/ Емуже, в Троице Святей славимому Богу,/ всяко колено покланяется Небесных, земных и преисподних: / темже и мы, яко крещеннии в Трисвятое Имя Твое,/ аще и недостойнии, хвалебное сие дерзаем принести Тебе пение:/ Ты же, яко Творец, Промыслитель и Судия наш,/ вонми гласу раб Твоих, и не отстави милости Твоея от нас,/ да из глубины души выну зовем Ти:/ Свят, Свят, Свят еси Господи Боже наш,/ помилуй ны, падшее создание Твое, Имене ради Святаго Твоего.

МОЛИТВА КО ПРЕСВЯТЕЙ ТРОИЦЕ

Пресвятая Троице, Единосущная Державо, всех благих Вина, что воздадим Тебе за вся, яже воздала еси нам, грешным и недостойным, прежде, неже на свет произъидохом, за вся, яже воздаеши коемуждо нас по вся дни и яже уготовала еси всем нам в веце грядущем? Подобаше убо за толикия благодеяния и щедроты благодарити Тя не словесы точию, но паче делы, храняще и исполняюще заповеди Твоя: мы же, страстем нашим и злым обычаем внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред трисветлое лице Твое безстудно явитися, но ниже Имене Твоего Пресвятаго изрещи довлеяше нам, аще бы не Ты Сама благоизволила, во отраду нашу, возвестити, яко чистыя и праведныя любящи, грешники кающияся милуеши и благоутробне приемлеши. Призри убо, о Пребожественная Троице, с высоты Святыя Славы Твоея на нас, многогрешных, и благое произволение наше, вместо благих дел, приими: и подаждь нам духа истиннаго покаяния, да возненавидевше всякий грех, в чистоте и правде, до конца дней наших поживем, творяще пресвятую волю Твою и славяще чистыми помыслы и благими деяньми сладчайшее и великолепое Имя Твое. Аминь.

 

 

Акафист святому праведному Симеону, Верхотурскому чудотворцу

 

Празднование 12/25 сентября и 18/31 декабря

Кондак 1

Избранному и дивному новому Сибирския страны чудотворцу всерадостно ныне приносим ти, святе Симеоне, хвалебная пения; ты же, яко имеяй дерзновение ко Христу Богу, от всяких нас бед свободи, да зовем ти:
Радуйся, Симеоне, чудотворче предивный.


Икос 1

Ангел во плоти и небесный человек явился еси, блаженне Симеоне, ангельски бо в мире сем пожил еси, темже и ангельстии чини удивишася непорочности твоего жития и, по преставлении твоем, с веселием прияша праведную твою душу; сего ради и мы, чудящеся высоте твоей добродетели, прославляем тя сице:
Радуйся, яко свято и богоугодно на земли пожил еси.
Радуйся, яко подвигом добрым зде подвизався, течение свое праведно скончал еси.
Радуйся, яко ныне преселился еси в покоища небесная.
Радуйся, яко во обителех премирных, яже уготова Бог любящим Его, на нескончаемыя веки водворяешися.
Радуйся, яко Царь царствующих прият тя в небесное царствие.
Радуйся, яко присно со Ангелы на небеси обитаеши.
Радуйся, яко с пророки и апостолы вселяешися.
Радуйся, яко с постники и преподобными торжествовати сподобился еси.
Радуйся, яко предстоиши ныне со всеми святыми Престолу Божию.
Радуйся, яко Пресвятую Троицу несредственне зрети сподобляешися.
Радуйся, яко неизреченную славу Господню явственне созерцаеши.
Радуйся, яко тоя причастника быти удостои тя Господь.
Радуйся, Симеоне, чудотворче предивный.


Кондак 2

Видя вдовицу зело плачущую, якоже бо тогда умилосердився, и изнемогшу телом и бывшу близ конечнаго издыхания и очима нимало зрети могущу, явився исцелил еси, сице и о мне умилосердися, угодниче Божий, и от многих грехопадений немощствующее тело мое исцели и душу мою ко спасению настави, да в радости воззову к Богу песнь: Аллилуия.


Икос 2

Разумети хотящу архиерею Сибирския страны имя твое, егда обретены быша святыя твоя мощи, ты в видении явлься ему, о имени своем возвестил еси; он же, удивився чудеси и прославив Бога, похвальныя глаголы вещая, вопияше тебе сице:
Радуйся, великий праведниче Божий, в чудесех просиявый.
Радуйся, целебниче недугов всем, призывающим тя с верою.
Радуйся, яко и прежде прошения помощию предварявши.
Радуйся, яко и недоумевающих о прославлении нетленных мощей твоих чудесы твоими вразумил еси.
Радуйся, яко разслабленных укрепил еси.
Радуйся, яко слепым прозрение даровал еси.
Радуйся, хромым хождение устрояяй.
Радуйся, от беснующихся бесов отгнателю.
Радуйся, скорбных утешителю.
Радуйся, нищих и убогих покровителю.
Радуйся, православных утверждение.
Радуйся, ересей посрамление.
Радуйся, Симеоне, чудотворче предивный.


Кондак 3

Сила Вышняго утверди тя в житии твоем святом; и ты подвизался еси о спасении души твоея, трудами бо и воздержанием увядил еси плотския страсти и в непрестанных молитвах твоих всегда взывал еси к Богу: Аллилуия.


Икос 3

Имеяй милосердие многое, о призывающих тя с верою присно молишися к Богу, у Него же равноангельным житием твоим великое дерзновение стяжал еси; не презри и нас, недостойных, требующих твоей помощи, и яко дары, приими от нас песнь сию:
Радуйся, яко вся, елика просиши от Бога, дарует ти Господь.
Радуйся, яко молитвы твои о нас, якоже кадило благовонное, от Бога приемлются.
Радуйся, яко возжада душа твоя к Богу крепкому.
Радуйся, Христа единаго возлюбивый.
Радуйся, яко невозвратным желанием последовал еси Ему.
Радуйся, добродетельное житие всегда имевый.
Радуйся, возненавидевый страсти мира сего.
Радуйся, маловременнаго утешения на земли не искавый.
Радуйся, смиренномудрием украсивыйся.
Радуйся, твердый адаманте и столпе непоколебимый прилоги вражиими.
Радуйся, яко нетлением тело твое прослави Господь.
Радуйся, яко от гроба твоего и персть приемлющии исцеляются.
Радуйся, Симеоне, чудотворче предивный.


Кондак 4

Буря недоумения смущает мя, како возмогу достойно воспети чудеса твоя, блаженне Симеоне, кто бо многих чудотворений твоих дары по достоинству изрещи может? Обаче и аз дивно в тебе прославляющемуся Богу вопити дерзаю: Аллилуия.


Икос 4

Слышавше, блаженне и предивне Симеоне, о величии чудес твоих, яко молитвами твоими сущих в бедах и скорбех предваряеши, скоро от них избавляя, вопием тебе таковая:
Радуйся, избавление наше от печалей и скорбей.
Радуйся, яко твоим предстательством даруется духовная благодать всем, с теплою верою к тебе притекающим.
Радуйся, яко твоими молитвами козни нечистых духов побеждены.
Радуйся, яко и неведущим и неслышавшим о прославлении твоем исцеление подаеши.
Радуйся, яко целебныя дары всюду точиши.
Радуйся, яко страну Сибирскую присно присещаеши.
Радуйся, скорый обидимых заступниче.
Радуйся, сущим в лютых обстояниих пособниче и предстателю.
Радуйся, малодушныя утешаяй.
Радуйся, недужным крепкое исправление.
Радуйся, плененным скорое свобождение.
Радуйся, грешным ко спасению наставление.
Радуйся, Симеоне, чудотворче предивный.


Кондак 5

Пресветлая звезда явился еси, праведный Симеоне; сущих бо во тьме умныя очи озаряя светом Евангелия Христова и избавляя заблуждших от сетей змиевых и от всех коварств его, научил еси я благодарственно и всерадостно с лики святых ко Христу Богу вопити: Аллилуия.


Икос 5

Видевше в житии твоем, блаженне, духовных подвигов твоих высокая исправления, всякий разум удивляющая, прославляем давшаго ти таковую благодать Бога, тебе же хвалебными гласы сице вопием:
Радуйся, яко юрод быв Христа ради, высоту смиренномудрия стяжал еси.
Радуйся, яко странник и пришлец на земли обрелся еси.,br>      Радуйся, яко ныне гражданином небесным быти на нескончаемыя веки сподобился еси.
Радуйся, яко незлобивый агнец в терпении твоем был еси.
Радуйся, яко кротостию ко озлобляющим тя землю живых наследовал еси;
Радуйся, чистыми душу и тело твое сохранивый, и ныне чистым сердцем зриши Бога.
Радуйся, яко мудрою мыслию утвердивый душу твою во спасение.
Радуйся, яко с невозвратною надеждою благ вечных преставился еси к Богу.
Радуйся, яко деснаго стояния со избранным сосудом удостоился еси.
Радуйся, яко не скрыл еси таланта, ввереннаго ти Богом.
Радуйся, благий рабе и верный, вшедый в радость Господа своего.
Радуйся, яко ныне утешаешися, якоже древний оный евангельский Лазарь, на лоне Авраамли.
Радуйся, Симеоне, чудотворче предивный.


Кондак 6

Проповедника богоноснаго Павла вещание и глаголы исполняя, Симеоне святе, юродственное Христа ради на земли пожил житие, и болезни многия претерпевая, всегда благодарственныя Богу возсылал еси хвалы, сице глаголя Ему: Аллилуия.


Икос 6

Возсиял еси велие просвещение светлостию чудес твоих, праведный Симеоне, от святаго гроба твоего непрестанно истекающих, и тем далече отгнал еси тьму ересей и расколов от окрестных мест, идеже в правоверии и благочестии подвизался еси и в нетлении телеси почивавши; мы же, чудищеся сим, взываем ти сице:
Радуйся, яко явился во стране Сибирстей крепкий защитник православия противу развратников и хульников Христовы Церкве.
Радуйся, яко и ныне борющимся с ними усердный пособник обретаешися.
Радуйся, противников святыя Церкви посрамителю.
Радуйся, злых волков от стада Христова отгнателю.
Радуйся, облекийся во оружие света.
Радуйся, лукавствующих обличителю.
Радуйся, православных тихое пристанище.
Радуйся, путешествующих благое поспешение.
Радуйся, яко и от многия скудости твоей разумевал еси на нища и убога.
Радуйся, яко милостив быв при жизни, благотвориши всем требующим и по смерти.
Радуйся, яко избрал еси добрая, еже Бога ради труждатися.
Радуйся, яко на тебе исполнися слово подвижническое, болезненно, еже труждатися, но блаженно восприятие.
Радуйся, Симеоне, чудотворче предивный.


Кондак 7

Хотящу некоему человеку от многих врачей исцелитися от очныя болезни, и егда ничтоже успе, прибегшу к тебе, врачу безмездному, ты очи его, наполнены кровию и зрети не могущая, перстию внезапу исцелил; он же возрадовався, благодаряше тя и, прославляя Бога, рече: Аллилуия.


Икос 7

Дивна тя показа нам Творец и Господь всех чудотворца: егда бо нетлением прослави тело твое, тогда и земля не скры гроб твой и яви всем нам, яко многоценное сокровище; темже и мы чудящеся вопием ти сице:
Радуйся, цвете нетленный, в стране Сибирстей прекрасно процветый.
Радуйся, доблий подвижниче благочестия, во граде Верхотурстем возсиявый.
Радуйся, яко являешися аки древо животное, от него же недугующии получают исцеление.
Радуйся, яко предстательством твоим пред Богом, аки ветвь благосеннолиственная, покрывавши нас.
Радуйся, яко добре вкоренился еси в вертограде Христовы Церкве.
Радуйся, яко обильные плоды добродетелей принесл еси Богу.
Радуйся, яко пиеши ныне воду животную от неисчерпаемаго источника безсмертия.
Радуйся, заблуждших наставниче.
Радуйся, яко кающимся в согрешениих испрошаеши от Бога прощение.
Радуйся, всех благих нам от Него ходатаю.
Радуйся, яко светлую одежду чистоты и целомудрия добре сохранив, вшел еси в чертог небесный.
Радуйся, яко чистая душа твоя к лику евангельских мудрых дев сопричтеся и купно с ними ангельски водворяется в небесном чертозе Жениха Христа.
Радуйся, Симеоне, чудотворче предивный.


Кондак 8

Странное на земли житие пожив и удалився суетнаго мира, добродетельми к Богу приближил ся еси, сего ради высокий Бог, видя твое смирение, возвеличи тя Своею благодатию; Егоже восхваляюще, поем Ему купно с тобою ангельскую песнь: Аллилуия.


Икос 8

Весь ум твой в вышний Иерусалим присно простирая, аще и телом на земли пребывал еси, вся красная мира сего возненавидел еси и равноангельское житие зде пожил, Симеоне блаженно, тем и от чтущих тя слышиши сия:
Радуйся, человече Божий досточудный.
Радуйся, зерцало добродетелей преизящных.
Радуйся, пременивый тленная настоящая на будущая вечная.
Радуйся, уподобивыйся Иову терпением.
Радуйся, селение честное Святыя Троицы.
Радуйся, святче Божий, со всеми святыми прославляемый.
Радуйся, ковчеже, от потопа греховнаго призывающих тя спасающий.
Радуйся, яко услаждал еси сердце твое веселием будущих благ.
Радуйся, воздержанием плоть твою изнуривый.
Радуйся, яко святостию жития твоего милость Божию обрел еси.
Радуйся, яко непрестанными молитвами о нас Бога умилостивляеши.
Радуйся, яко благим надеждам твоим исполнение приял еси.
Радуйся, Симеоне, чудотворче предивный.


Кондак 9

Все множество человеческое удивися еже на земли во плоти твоему терпению и незлобию, непорочна и праведна тя зряще, и ныне милостивым твоим предстательством в скорбех нас не оставляюща; темже и мы, радующеся, к Богу поем песнь: Аллилуия.


Икос 9

Витии многовещанныя изнемогоша по достоинству поведати многое твое терпение и теплую ко Христу любовь; аз же, многогрешный, како возмогу изглаголати равноангельное твое житие и преславная чудеса! Но обаче дерзаю, надеяся на твое беззлобие, вопити тебе сице:
Радуйся, яко Ангелом подобяся, выну пущал еси на небо очи твоего сердца.
Радуйся, яко доблими твоими подвиги спасение и венец нетленный от Христа Бога приял еси.
Радуйся, яко на всяк день и на всяку нощь славословил еси Творца всяческих.
Радуйся, яко победил еси диавола смирением своим.
Радуйся, яко нищ телом и духом был еси на земли, сего ради уготова ти Господь царство небесное.
Радуйся, кротости ради твоей наследивый землю обетования.
Радуйся, яко и иных, зрящих твою святость, научил еси праведно жити.
Радуйся, яко душевныя страсти исцеляеши.
Радуйся, яко телесныя болезни врачуеши.
Радуйся, яко и многовременныя недуги от человек отгоняеши.
Радуйся, яко сущим близ конечнаго издыхания здравие даруеши.
Радуйся, яко и от смертоносных язв свобождаеши.
Радуйся, Симеоне, чудотворче предивный.


Кондак 10

Спасение восхотев дати Господь людем Своим, светлаго светильника даде всем нам тебе, точаща благодать цельбы всем, притекающим к раце мощей твоих; и мы, получивше милость от тя, безмезднаго врача, благодарными гласы восхваляюще Бога, поем песнь: Аллилуия.


Икос 10

Стена еси ты и покров всем притекающим к тебе, праведный Симеоне, ибо Господь прослави тя, украсив нетлением и чудесы и приглашати тебе научи:
Радуйся, столпе непоколебимый православия.
Радуйся, сокровище неоскудно многих исцелений.
Радуйся, подателю просящим у тебе яже на пользу.
Радуйся, уцеломудривый живущия студно.
Радуйся, наказателю помраченных умом.
Радуйся, учителю смиренномудрия и терпения.
Радуйся, яко в сониях являяся, научаеши доброму житию.
Радуйся, звездо, чудесно возсиявшая в Сибирстей стране.
Радуйся, яко лучами чудотворений твоих просвещаеши и далечайшия страны.
Радуйся, яко некогда незнаем, ныне же со славою познаваешися от всех ищущих тя.
Радуйся, яко рыбарем быв, соделался еси ловцем человеков.
Радуйся, яко ходатайством твоим к Богу мук вечных свобождаеши нас.
Радуйся, Симеоне, чудотворче предивный.


Кондак 11

Пение умиленное приношу ти, ходатайствуй за мя присно к Богу, душею и телом от страстей, воюющих на мя, люте недугующаго, и подаждь ми молитвами твоими исцеление и грехов избавление, от сердца тебе сия приносящему, да и аз в радости воспою прославляющему тя Богу песнь: Аллилуия.


Икос 11

Светоприемную свещу зрим тя, богомудре Симеоне: невещественным бо любве огнем возжеглся еси и наставляеши к божественному деянию вся, образом жития твоего, яко зарею, просвещая чувства наша; темже и достоин еси званием почитатися сим:
Радуйся, луча пресветлая, от Солнца Христа возсиявшая.
Радуйся, светило благочестия немерцающее.
Радуйся, яко свет премудрости Божия просвети душу твою.
Радуйся, яко вечнаго сего света лучей чрез тебе и мы сподобляемся.
Радуйся, безмездный врачу.
Радуйся, яко источаеши обильныя струи исцелений.
Радуйся, благонадежный о нас предстателю и молитвенниче пред Престолом Господним.
Радуйся, спасительное пристанище всем, притекающим к тебе.
Радуйся, яко сущим в пучине скорбей добр обретаешися кормчий.
Радуйся, теплый заступниче сущим во обстояниих лютых.
Радуйся, благоухание духовное источаяй от многоцелебных твоих мощей.
Радуйся, елеем радования исцеляяй скорби душевныя верою молящихся тебе.
Радуйся, Симеоне, чудотворче предивный;


Кондак 12

Благодать превелию даде тебе Господь недужных болезни врачевати, демоны прогоняти и страсти целити; темже не забуди и нас, усердно призывающих тя во время тесных обстояний и тяжких напастей, и молитвами твоими от оных избави, да благодарно вопием к Богу: Аллилуия.


Икос 12

Поюще твоя чудеса, праведный Симеоне, верою несомненною притекаем к многоцелебным и святым мощем твоим, и припадая к ним, с любовию и страхом лобызаем оныя. Ты же, о святче Божий, яко благоутробный, принеси моление ко Владыце, да сподобит нас деснаго стояния на Суде Своем, вопиющих к тебе сицевая:
Радуйся, великий Христов угодниче.
Радуйся, молитвенниче усердный о воспевающих тя.
Радуйся, Божий избранниче, благодатию Духа Святаго приосененный.
Радуйся, праведниче, возвеселивыйся о Господе.
Радуйся, яко мзда твоя многа на Небесех.
Радуйся, предстателю наш скорый и теплый.
Радуйся, ходатаю неусыпный о нас пред Богом.
Радуйся, иго благое и бремя легкое понесый.
Радуйся, за труды твоя и подвиги на земли вечное упокоение обретый на небеси.
Радуйся, яко временных и вечных благ от Бога нам присно просиши.
Радуйся, о кающихся споручниче пред Богом.
Радуйся, кадило благовонное, облагоухающее чтущих тя.
Радуйся, Симеоне, чудотворче предивный.


Кондак 13

О пречудный и милостивый новый чудотворче, праведный Симеоне! Приими ныне малое сие моление наше и принеси е ко Христу Богу нашему, да сохранит нас от враг видимых и невидимых, от нашествия иноплеменник, от недуга и глада, от всякия скорби и внезапныя смерти и будущаго вечнаго мучения избавит, молитвами твоими, всех вопиющих к Нему: Аллилуия.


Этот кондак читается трижды. Затем икос 1-й: «Ангел во плоти…» и кондак 1-й: «Избранному и дивному».

 

 


Молитва святому праведному Симеону Верхотурскому

О святый и праведный Симеоне, чистою душею твоею в небесных обителех в лице святых водворяяйся, на земли же телом твоим нетленно почиваяй! По данной ти благодати Господа молитися о нас, милостивно призри на нас многогрешных, аще и недостойне, обаче с верою и упованием ко святым и цельбоносным мощем твоим притекающих, и испроси нам от Бога прощение согрешений наших, в няже впадаем множицею во вся дни жития нашего и якоже прежде овым убо от очныя зельныя болезни ни мало зрети могущим исцеление очес, овым же близ смерти бывшим от лютых недугов врачевание, и иным иная многая преславная благодеяния даровал еси; сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарив восхваляюще тя, прославим Бога, дивнаго во святых Своих, Отца и Сына и Святаго Духа и ныне и присно и во веки веков. Аминь.


Тропарь праведному Симеону Верхотурскому
Тропарь, глас 4

Мирскаго мятежа бегая, все желание обратил еси к Богу, да в видения восход обрящеши Горе, отнюдуже не уклонився в лукавствия сердца, но очистив душу и тело, приял еси благодать точити цельбы верным и неверным, притекающим к тебе, праведный Симеоне. Темже, по данному ти дару, испроси у Христа Бога исцеление нам, болящим душевными страстьми, и моли спасти души наша.


Тропарь, глас 4 (Перенесение мощей)

Днесь радуется славная страна Сибирь, обретши святыя твоя мощи внутрь себе. Архиереи, священницы и воеводы и весь сонм людский, духовне веселящеся, вопием ти: о, богомудре Симеоне! Избави нас, иже к тебе прибегающих, от всех бед, просяще подати всем по коегождо прошению и избавитися стране сей и граду от огненнаго запаления и поганскаго нашествия и междоусобныя брани и от всякаго зла: тем же и мы вси чтем честных и многоцелебных мощей твоих обретение, новый целебниче, и вопием: слава Давшему тобою всем исцеление!

Добавить комментарий

Ваш e-mail не будет опубликован.